იუპიტერის ტრინი სინასტრიულ პლანეტებთან

იუპიტერის ტრინი სინასტრიულ პლანეტებთან

მამაკაცის იუპიტერი ტრინში ქალის მზესთან

ამ ასპექტს ურთიერთობაში წინასწარჭვრეტა და სიბრძნე შემოაქვს. ეს საერთო სურვილების გაფართოვების ასპექტია. ხშირია მოგზაურობებიც. მამაკაცი შეიძლება იყოს ამ ურთიერთობის წამყვანი, სიმართლითა და იმ ფორმის ხელმძღვანელობით, რომელიც ორმხრივ ურთიერთპატივისცემასა და ნდობას ბადებს. ამ ასპექტს უკავშირდება  შემთხვევითი და არაპროგნოზირებადი მოვლენები, რამაც შეიძლება სარისკო მოქმედებებამდე მიიყვანოს წყვილი. მაგალითად, ინვესტიციების ფლანგვა ან უზომო პიროვნული თავისუფლების მოთხოვნა. თუმცა, საერთო ჯამში, მზისა და იუპიტერის ტრიგონი ერთერთი ყველაზე დადებითი ასპექტია, რომელიც ხელს უწყობს დადებითი გარემოებების ჩამოყალიბებას. სინასტრიაში ის ექსპანსიურ და გულღია ურთიერთობაზე მიუთითებს.

 

ქალის იუპიტერი ტრინში მამაკაცის მზესთან

ეს ასპექტი საერთო მსოფლმხედველობასა და შეხედულებებზე მეტყველებს. ორივე პარტნიორი მშვენივრად გრძნობს ურთიერთგაგებისა და გულწრფელობის მნიშვნელობას. ქალი ძალიან ამაყობს ამ ურთიერთობით და სწორედ ეს გრძნობა უბიძგებს მას, დღითიდღე მეტი სიყვარული გასცეს. გარდა ამისა, ეს ასპექტი აძლიერებს საერთო იღბალს და თვალისმომჭრელ ბრწყინვალებას მატებს პარტნიორობას.

 

მამაკაცის იუპიტერი ტრინში ქალის მთვარესთან

ისინი სიამოვნებით მოგზაურობენ, ფილოსოფოსობენ  და გატაცებით ეძებენ  თავიანთ ადგილს ცხოვრებაში. ქალი დიდად აფასებს მამაკაცის თავისუფალ სულს და მისთვის მყუდრო ბუდეს უზრუნველყოფს. მამაკაცი  მას ემოციური „მეს“ განვითარებასა და  გაფართოვებაში ეხმარება.  ვერ ვიტყვის რომ ეს ასპექტი მყარი ურთიერთობის გარანტია, თუმცა სიამოვნება და კმაყოფილება ნამდვილად მოაქვს.

 

ქალის იუპიტერი ტრინში მამაკაცის მთვარესთან

ეს ასპექტი ურთიერთობას ბედნიერების და სიმსუბუქის შეგრძნებას ანიჭებს. გაფართოვებული გრძნობები მამაკაცს ასწავლის, როგორ იპოვოს თავისი ადგილი კოსმიურ სამყაროში. თავის მხრივ, ქალის სწავლობს, როგორ შეუთავსოს ემოციები უმაღლეს გონებას. თუ აქამდე პარტნიორები სიფრთხილეს ავლენდნენ გადაჭარბების თვალსაზრისით, ამ ასპექტს შეუძლია შექმნას ჭეშმარიტების ემოციური ცენტრი პარტნიორობაში.  თუმცა თუ ეს ექსპანსია სხვა ასპექტებით არ არის დაბალანსებული, ეგზალტირებულმა ემოციებმა შესაძლოა საფრთხე შეუქმნას ურთიერთობის მდგრადობას.

 

მამაკაცის იუპიტერი ტრინში ქალის მერკურისთან

აქ ქალის ინტელექტი გასხივოსნებულია მამაკაცის სამყაროს გაფართოვებული ბუნების გაგების უნარით. მამაკაცი მას აზროვნების ახალ მეთოდებს აცნობს და  ის ძლიერ მოხიბლული დარჩება, როდესაც თვითონაც მიხვდება, რამხელა მასშტაბებს იძენს მისი მარტივი იდეები. როდესაც იუპიტერი ქალის გონებაში სინათლეს აანთებს, ის ჭეშმარიტების მაცნე ხდება, რომელსაც სხვების გაასხივოსნების უნარიც შესწევს. ეს ასპექტი არამხოლოდ ორმხრივ პერსონალურ ზრდაზე, არამედ სულიერი გარღვევების შესაძლებლობაზეც მიუთითებს.

 

ქალის იუპიტერი ტრინში მამაკაცის მერკურისთან

ამ ასპექტით მამაკაცის უმდაბლესი გონება ქალის უმაღლეს გონებას ერწყმის, რითაც უაღრესად ჰარმონიული ურთიერთგაგება იქმნება. ქალი გულუხვად კვებავს პარტნიორს თავისი იდეებით, რასაც ის ძალზედ მარტივად ითვისებს. ამრიგად, ეს ასპექტი ხელს უწყობს მამაკაცის ცნობიერების გაფართოვებას. იმავდროულად, მამაკაცი რჩეულს თვითგამოხატვის საშუალებებით ამარაგებს, რომ ქალმა საკუთარი იდეების გამოხატვა შეძლოს. თუ მამაკაცი პრაქტიკული და კეთილგონიერია, ეს მშვენიერი ასპექტია ორივე მათგანის სულიერი ზრდისთვის. გონებისა და სინათლის შერწყმით ჭეშმარიტი რენესანსი (აღორძინება) იწყება.

 

 

მამაკაცის იუპიტერი ტრინში ქალის ვენერასთან

ამ ასპექტს ბევრი მხიარულება და ოპტიმიზმი შემოაქვს ურთიერთობაში. მამაკაცის თავისუფალი გონება იმ სიბრძნეს უზრუნველყოფს, რომელიც ქალის შემეცნებას ათბობს და მის სიყვარულის უნარს აძლიერებს. ის აღფრთოვანებულია მამაკაცის შესანიშნავი თვისებებით და რბილად აქეზებს მის იდეებს, რაც მამაკაცს ეხმარება მიაღწიოს თავის უმაღლეს „მეს“. თუ მამაკაცის ჰოროსკოპში  სტაბილურობის სხვა სიგნიფიკატორებიც არსებობს, ეს დიდი ბედნიერებისა და მყარი ურთიერთობის ასპექტია. სიმბოლურ გლადიატორს ხელში ატაცებული მიჰყავს თავისი გულის სწორი.

ქალის იუპიტერი ტრინში მამაკაცის ვენერასთან

სიყვარულის ძალა უმთავრესი ფოკუსი ხდება ამ ურთიერთობაში. მამაკაცს, თავისი ანიმეს მეშვეობით, შეუძლია აღიქვას პარტნიორის უმაღლესი მენტალური გონება. ქალი ნათელი მომავლის რწმენას უზრუნველყოფს, რომელსაც მამაკაცი მშვენივრად აღიქვამს თავისი მგრძნობიარე ნაწილით. ნაყოფიერი თანამშრომლობა და თვალსაჩინო პიროვნული ზრდა _ ამ ურთიერთობის საკვანძო ნოტებია, რისი წყალობითაც ორივე პარტნიორი თანაბრად იმკის საერთო ბედნიერების ნაყოფს.

 

მამაკაცის იუპიტერი ტრინში ქალის მარსთან

ქალი გაიგივებულია თავის ანიმუსის ფიგურასთან, რომ პარტნიორთან ერთსულოვნების გრძნობა უზრუნველყოს. მართალია, მამაკაცი თავის გარშემო უამრავ ალტერნატიულ შესაძლებლობას ამჩნევს, მაგრამ იმასაც კარგად გრძნობს, რომ მას ეს ქალი სჭირდება, როგორც საყრდენი წერტილი.  ის ყოველთვის ოპტიმისტურად რეაგირებს ქალის მოლოდინებზე. თუ ისინი რეალისტურ მიზნებს დაუსახევენ საკუთარ თავს, მშვენიერი შანსი აქვთ მათ განსახორციელებელად. თუ საერთო დიადი მიზნები არ აღმოაჩნდათ, მაშინ სულსწრაფობა და გაღიზიანება გაანადგურებს იმას, რაც შესაძლოა ნაყოფიერი პარტნიორობა ყოფილიყო.

 

ქალის იუპიტერი ტრინში მამაკაცის მარსთან

ეს ასპექტი ძლიერ ინტერესს ბადებს სპორტის, აქტიური დასვენებისა და მოგზაურობების მიმართ. ამ ურთიერთობისთვის დამახასიათებელია ინტენსიური ხასიათი.  ქალს შეუძლია პარტნიორს მიუღწეველის მიღწევა ასწავლოს, რაც მას ცნობიერების განვითარებაში დაეხმარება. მამაკაცი, თავის მხრივ, მის მენტალურ პროცესებს აძლევს სტიმულს, რის შედეგადაც ქალი  გაცილებით მეტ  იდეებს გენერირებს, რაც ხელს შეუწყობს მათი ურთიერთობის პროგრესულად განვითარებას. ეს ურთიერთობა  მაღალი აქტივობითა  და სწრაფი დინამიკით გამოირჩევა, რადგანაც პარტნიორები სიამოვნებით ეხმარებიან ერთმანეთს  ინდივიდუალიზმის განვითარებაში.

 

იუპიტერების ტრინი

ეს ასპექტი აძლიერებს იღბალსა და წარმატებას, რადგან ურთიერთობაში მეტად კეთილისმყოფელი შესაძლებლობები და ექსპანსიურობა შეაქვს. ორივე პარტნიორი იშვიათ გულგახსნილობას ავლენს. ქალიც და მამაკაციც  თავიანთი უმაღლესი გონების მეშვეობით ავსებენ ერთმანეთს. ამიტომ, ეს ძალზედ უშუალო ურთიერთობაა, რომელიც თითოეულ მათგანს საშუალებას აძლევს, შეინარჩუნოს თავისუფალი აზროვნება და იმავდროულად, ჰარმონიაში იყოს პარტნიორის შეხედულებებთან.

 

 

მამაკაცის იუპიტერი ტრინში ქალის სატურნთან

მამაკაცის ექსპანსიურ ბუნებას ქალის ბრძნული სიფრთხილე ემატება. ქალი იმ მტკიცე საყრდენის ფუნქციას ასრულებს, რომელზე დაყრდნობით, მამაკაცი ნახტომს აკეთებს. ამრიგად, ქალის რეალისტური პოზიცია მამაკაცის იმედებსა და მოლოდინებს გონიერების ფარგლებში ინარჩუნებს.  ქალი შესაძლოა თავისი მამის ფუნქციას ასრულებდეს, განსაკუთრებით ურთიერთობის ცენტრალური ცნობიერების ფორმირების პროცესში. მისი პროტექციული, ინური პოზიცია მშვენიერი საპირწონეა მამაკაცის იანური თვისებებისთვის, რომელიც მუდმივად თვითგამოხატვას ცდილობს. ეს პოზიტიური კარმის ასპექტია, რადგან ქალის მემკვიდრეობითი წარმომავლობა შერწყმულია მისი პარტნიორის კულტურულ პოზიციებთან. ის ნაყოფიერ ნიადაგს ქმნის მამაკაცის იდეებისთვის. შედეგად, ეს ასპექტი ღირსებას და ურთიერთპატივისცემას მატებს ამ საოცარ პარტნიორობას.

 

ქალის იუპიტერი ტრინში მამაკაცის სატურნთან

გახსნილობისა და გულწრფელობის წყალობით, ქალს შუეძლია მამაკაცს საკუთარი თავის ფასი გააგებინოს. მამაკაცი შესაძლოა საკუთარი მამის (ან მამის მსგავს) როლს ასრულებდეს, რომ  ქალზე, ღირსებისა და პატივის გრძნობით, დადებითი შთაბეჭილება მოახდინოს.  რაც უფრო აფართოვებს ქალი მის ცნობიერებას, მით უკეთესად ხედავს მამაკაცი, რატომ უნდა დაიცვას ის წესები, ტრადიციები თუ ჩვევები, რითაც მისი არსებობა არის გამსჭვალული. ეს კარმული ასპექტი კეთილგონიერებას და სიბრძნეს აერთიანებს.  ქალი კონსერვატულ როლს ასრულებს, მაშინ როდესაც მამაკაცს უფრო აღმქმელის როლი შეესაბამება (რაც დადგენილი სტრუქტურის სიმბოლოა). ისინი აწონასწორებენ ერთმანეთს. ამიტომ, ეს ბრწყინვალე ასპექტია ხანგრძლივი, დაბალანსებული და მზარდი პარტნიორობისთვის.

 

მამაკაცის იუპიტერი ტრინში ქალის ურანთან

მამაკაცის თავისუფალი სული კარგი სტიმულია ქალის ინტელექტისთვის. ქალი გენერირებს იდეებს, რომელიც მამაკაცს ააქტიურებს. მამაკაცი კი მას ცნობიერების გაფართოებაში ეხმარება. ორივე მათგანი ძლიერ ინდივიდუალიზმს ავლენს, თუმცა მათი ფილოსოფიური შეხედულებები ჰარმონიულად ერწყმის ერთმანეთს. ამრიგად, თითოეული მათგანი პატივისცემით ეპყრობა პარტნიორის ფსიქიკურ სივრცეს. ეს შესანიშნავი ასპექტია ზრდისთვის და ოპტიმისტური სამომავლო  პერსპექტივებისთვის. თითოეული მათგანი მშვენივრად ამჩნევს პარტნიორის დაუდეგარ ბუნებას, მაგრამ მათ კავშირში ეს საერთო აქტივობებით ვლინდება: სპორტული თამაშებით, მოგზაურობითა და გართობით, რაც სახალისო შტრიხს სძენს ამ ურთიერთობას.  ეს ასპექტი განსაკუთრებით კარგად მუშაობს იმ შემთხვევაში, როდესაც ორივე პარტნიორი თავის კარიერას იკეთებს.

 

ქალის იუპიტერი ტრინში მამაკაცის ურანთან

ქალი მამაკაცის ინტელექტს აფართოვებს. მისი გახსნილობა და თავისუფალი სული მამაკაცის ორიგინალობის და გამომგონებლობის მთავარი შთამაგონებელი ხდება. ამრიგად, ქალი მიდრეკილია გამოავლინოს მისი საუკეთესო თვისებები, რაც, რომ არა ეს ურთიერთობა, არ გამოვლინდებოდა. მამაკაცს, თავის მხრივ, მშვენივრად ესმის მისი თავისუფალი სივრცის მოთხოვნა. ამიტომ, ძალიან დემოკრატიულად ეპყრობა, ყოველგვარი მესაკუთრული და მიკერძოებული პოზიციების გარეშე. ისინი თავისუფლად და უშიშრად გამოხატავენ საკუთარ იდეებსა და ინდივიდუალიზმს, ამიტომ ეს ძალიან ხალისიანი და პროგრესული ურთიერთობაა.

 

მამაკაცის იუპიტერი ტრინში ქალის ნეპტუნთან

ეს ასპექტი ხელს უწყობს ორივეს ოცნებების, იმედებისა და სურვილების გაფართოებას. შემართებისა და ოპტიმიზმის წყალობით, მამაკაცი ქალის წარმოსახვას აცოცხლებს. ქალი კი ნაირფერად ავსებს, მეტ სიღრმესა და გრძნობებს მატებს მის იდეებს. სულიერი პრინციპები და ძირითადი ფილოსოფიური შეხედულებები ჰარმონიულად ერწყმის ერთმანეთს, რაც მათ ურთიერთობას სასიამოვნო სიმსუბუქეს მატებს. თუმცა ისინი ფრთხილად უნდა იყვნენ მთავარ სირთულესთან _ ეს სიმსუბუქე შესაძლოა სიზარმაცედ იქცეს. მნიშვნელოვანია, ყოველთვის ახსოვდეთ ძირითადი ამოცანები და მიზნები. გრძნობების გაფართოებამ შესაძლოა ორივეს განსაკუთრებული რეალობის შექმნისკენ უბიძგოს, რაც ობიექტურ რეალობაზე უკეთესად მოეჩვენებათ. ამიტომ, მნიშვნელოვანია შეინარჩუნონ ობიექტურობის განცდა და არ მოწყდნენ დედამიწას.

 

ქალის იუპიტერი ტრინში მამაკაცის ნეპტუნთან

ეს ასპექტი გახსნილ და ძალზედ სულიერი ხასიათის ურთიერთობას აყალიბებს. ქალი ჭეშმარიტებას ეძებს და მის გაგებას მამაკაცის ინტუიცია ადასტურებს. ქალი შესაძლებლობებს გრძნობს, მამაკაცი _ საგნების არსს. ორივე პარტნიორი თავისუფლად უთმობს ერთმანეთს, როდესაც ერთობლივი ძალებით, თავიანთ ამაღლებულ რეალობას ქმნიან, რასაც დამოუკიდებლად ვერ მოახერხებდნენ. მამაკაცი მიდრეკილი პესიმიზმისკენ, მაშინ როდესაც ქალი აუცილებელ ოპტიმიზმს უზრუნველყოფს. თუ ორივე პარტნიორი პრაქტიკულია ეს შესაძლოა ბრწყინვალე ასპექტი აღმოჩნდეს, ურთიერთზრდისა და სწავლისთვის.

 

მამაკაცის იუპიტერი ტრინში ქალის პლუტონთან

ქალი მხარს უჭერს მამაკაცს, რაც იმ სიღრმეს უზრუნველყოფს, რომელზე დაყრდნობითაც მისი გაგება ვითარდება.  მამაკაცი კი მის ძიებას აქეზებს. ორივე პარტნიორი იმის ძიებაშია, რაც ადამიანური ლოგიკის საზღვრებს სცდება. ქალი რეალობას ვერტიკალურ პროექციაში ხედავს, მამაკაცი _ ჰორიზონტალურ პერსპექტივაში.  ამრიგად, ეს ორი ხედვის წერტილი ჰარმონიულად იკვეთება ერთმანეთთან, მათ თვალწინ  ჭეშმარიტი მისტერია იშლება. ქალი თანდათან ანგრევს თავის წარსულს და პარტნიორობის ცნობიერებაში საკმარისს სირცეს ქმნის, რომ მისი სული თავიდან დაიბადოს.

 

ქალის იუპიტერი ტრინში მამაკაცის პლუტონთან

მამაკაცი უზრუნველყოფს მყარ ნიადაგს, რომლის გამოყენებაც შეუძლია ქალს, როდესაც თავის ცნობიერებას აფართოვებს. მამაკაცი ანადგურებს ილუზიების ფარდას და საშუალებას აძლევს ქალს დაინახოს სინათლე, თუმცა ამ პროცესში არაერთ გამოცდას უწყობს, რადგან ქალმა უნდა ისწავლოს უფრო სირღმისეული ხედვა. წინააღმდეგობების გადალახვას თან ახლავს სულიერი გამდიდრება. ეს განსაკუთრებული ასპექტია, რომელიც უხვად ყრის დაბრკოლების ქვებს ურთიერთობის თითქოს-და მშვიდ დინებაში, თუმცა ორივე პარტნიორს უზარმაზარი ძალით აჯილდოვებს და ხელს უწყობს დაბრკოლებების გადალახვაში. ამრიგად, ეს გამოწვევები მათ გასხივოსნებისკენ მიუძღვის.


About Qet Adastra

Не от мира сего…

Scroll To Top