ტრანზიტული მთვარე თევზებში

მთელი თვის განმავლობაში მთვარე თორმეტივე ზოდიაქოს ნიშანს თანმიმდევრობით შემოივლის. ტრანზიტული მთვარე თევზებში ნიშნავს, რომ ამჟამად მთვარე თევზების ნიშანს გადის.

დადებითი კუთხით: ემოციურობა, თანაგრძნობა, ერთიანობის განცდა, ინტუიცია

უარყოფითი კუთხით: გავლენის ქვეშ ადვილად მოქცევა, მიმნდობობა, საკუთარი თავის შეცოდება, მოდუნება.

გაანალიზეთ წინა პერიოდი, შეაჯამეთ.

გაურკვეველ  სიტუაციებს აჯობებს თავი აარიდოთ, ამ დღეს მოსალოდნელია სიღრმისეული შეცდომების დაშვება.

მეტად მგრძნობიარეები ვხდებით, ამიტომ წყენის ალბათობაც დიდია. ეცადეთ ერთმანეთის გაგებაზე ორიენტირდეთ.

ინტუიციასა და შინაგან ხმას დაეყრდენით. ენდეთ, მაგრამ შეამოწმეთ.

შემოქმედებითი დღეა. მუსიკას მოუსმინეთ, განიტვირთეთ. თქვენი ჰობი და ინტერესები გაიხსენეთ. ხატვა გიყვართ? დახატეთ. ცეკვა? – იცეკვეთ.

ყველანაირი   ხელოვნების, პარაფსიქოლოგიური ცდებისთვის, მკითხაობისა და ექსტარასენსორული უნარების გავარჯიშებისთვის  წარმატებული პერიოდია. ყველა იმ სფეროში  სადაც საჭიროა ფანტაზია, რომანტიზმი და სიყვარული  –  სასიკეთო დღეა.  შეგიძლიათ წამოიწყოთ სასამართლო პროცესები, დაკავდეთ ქველმოქმედებით.  ხელსაყრელი დღეა უფროსობასთან ურთიერთობებისთვის,  ყველა საქმიან სფეროებში მოლაპარაკებებისთვის რაც უკავშირდება  თხევად პროდუქტებს, წყალს. (ლუდის ქარხნები, თევზის მრეწველობა, ნავთობპროდუქტები  და ა.შ ).

უფრო მეტად წარმატებულია: ფსიქოლოგებისთვის, ფსიქოთერაპევტებისთვის, რეჟისორებისთვის, სოციალური მუშაკებისთვის, საქველმოქმედო სფეროში მოღვაწე ადამიანებისთვის.

სიყვარული: იყავით რომანტიული, სითბო გამოხატეთ პარტნიორის მიმართ. ნუ მოიტყუებით. ამ დღეს დაწყებული ურთიერთობა საკმაოდ ფაქიზი, სენტიმენტალური და რომანტიული იქნება. შესაძლოა თავი „მეცხრე ცაზე“ იგრძნოთ. უარყოფითი კუთხით მაღალია ილუზიები.

ფინანსები: მეტად მიდრეკილნი ვართ ლამაზი ნივთების შეძენაზე, თანხის დახარჯვაზე. მოერიდეთ ფინანსური შეთანხმებების გაფორმებას.

ჯანმრთელობა: ამ პერიოდში მთვარია ენერგეტიკული დანახარჯების შემცირება და ყოველდღიური თავის მოვლის როიტუალების დაცვა. კარგია დიეტის დაცვა, რომელიც ორგანიზმიდან გამოდევნის შლაკებსა და ტოქსინებს. ეფექტურია ამ დღეს არაინფექციური ანთებითი დაავადებების მკურნალობა. ქვედა კიდურები ზოგადად სუსტია ამ პერიოდში, განსაკუთრებით ტერფები და წვივები, ნებისმიერი ქირურგიული ჩარევა ამ ზონაზე უკეთესია სამომავლოდ გადადოთ. მოერიდეთ ხანგრძლივ სიარულს, ფეხზე დიდხანს დგომას, მაღალქუსლიანი ფეხსაცმლის ტარებას.

არასასურველია: მთაში  ლაშქრობა  და  ახალი საქმეების დაწყება,  ალკოჰოლური სასმელებისა და მედიკამენტების (თვითნებური ან ზედმეტი) მიღება.

რეკომენდებულია: ხელოვნებისთვის დროის დათმობა, ექსტრასენსორული უნარების გავარჯიშება, ქველმოქმედება.

ტრანზიტული პლანეტები  ნათალური ჰოროსკოპის სახლებში

ამა თუ იმ სახლის თავისებურება ძალიან მკაფიოდ ვლინდება ნათალურ რუკაში, როდესაც სახლს ტრანზიტული პლანეტა ააქტიურებს. როგორც ცნობილია, პლანეტები სხვადასხვა სიჩქარით მოძრაობენ. მაგალითად, მთვარე ზოდიაქოს წრის თორმეტივე ნიშნის და შესაბამისად, ჰოროსკოპის თორმეტივე სახლის გავლას 28 დღეს ანდომებს; მზე 1 წელიწადს; იუპიტერი 12 წელს; სატუნრი 28 წელს; ურანი 84ს და ა. შ. ლოგიკურად, რაც უფრო ნელა მოძრაობს პლანეტა, მით უფრო დიდხანს ჩერდება ერთ ნიშანში/სახლში. სახლის შესაბამისი სფეროც უფრო აქტიურად ვლინდება. სახლის გააქტიურების თავისებურება დამოკიდებულია თავად სახლის (ველის) მონაცემებზე: სად არის განთავსებული, რა ზომისაა, ცარიელია თუ ტრანზიტულ პლანეტას ნათალური პლანეტა მასპინძლობს, რომელი ნათალური პლანეტები ან ფიქტიური წერტილებია მასში განთავსებული და რა თქმა უნდა, ასპექტები, როგორც ნათალურ ისე ტრანზიტულ პლანეტებს შორის. ამას გარდა, მხედველობაში უნდა მივიღოთ, როგორ არის გამოხატული თავად ეს პლანეტა ნათალურ რუკაში, ჰარმონიულად თუ დისჰარმონიულად. მხოლოდ ყველა ამ ასპექტის გათვალისწინებით, შეგვიძლია შევაფასოთ მისი გავლენა დადებითად ან უარყოფითად.

ტრანზიტული პლანეტის გავლენა სახლზე არ ჩამოუვარდება ნათალური პლანეტის გავლენას. მხოლოდ ნათალური (დაბადების) პლანეტების განლაგება დაფიქსირებულია ერთხელ და  სამუდამოდ, დაბადების მომენტში. ტრანზიტული პლანეტები კი მუდამ მოძრაობენ, ქმნიან დადებით ან უარყოფით ასპექტებს.

 

 

მთვარის ტრანზიტი ნათალური ჰოროსკოპის სახლებში:

როგორც უკვე გითხარით, მთვარე ზოდიაქოს წრის და შესაბამისად, ჰოროსკოპის სახლების გავლას 28 დღეს ანდომებს. მთვარის დღე მზის დღეზე ნაკლებია.

მთვარის ბუნება ნოტიოა. მისი პრინციპი  ცვალებადობაა. ნათალურ რუკაში სახლი (ცხოვრების სფერო), სადაც  მდებარეობს  მთვარე, არ გამოირჩევა სტაბილური ხასიათით. შესაბამისად, მთვარეს სახლში შეაქვს მერყეობა.

მთვარე დაკავშირებულია სახლთან, ოჯახთან, დედასთან, პირველად საჭიროებებთან. მთვარე რეაგირებს ემოციურად (ირაციონალურად). ის ზემოქმედებს აღქმაზე.

სწრაფი მოძრაობიდან გამომდინარე, უშუალოდ მთვარე ნაკლებად ხდება კონკრეტული მოვლენების გამომწვევი. ის უფრო ნათალურ და ტრანზიტულ პლანეტებთან თანამშრომლობით მუშაობს. ასე ვთქვათ, მომწიფებული მოვლენის (რაც ნათალური და ნელი პლანეტების ტრანზიტით არის მომზადებული) ჩამრთველი ხდება. მთვარის გავლენა ყველაზე მძაფრად ადამიანის ემოციურ მდგომარეობაზე აისახება. შესაბამისად, ის ცვლის ჩვენს შინაგან დამოკიდებულებას კონკრეტული სფეროს მიმართ, სადაც ტრანზიტით იმყოფება.

 

მთვარის ტრანზიტი ნათალური ჰოროსკოპის

I სახლში

ყველაფერი რაც დაკავშირებულია პიროვნების გარეგნულ გამოვლინებასთან. ამ დღეებში შეიძლება გაგიჩნდეთ გარეგნობის შეცვლის სურვილი, განსაკუთრებით ქალებს. ეხება თავს, სახეს. შესაძლებელია დასიება, გაციება.

 

II სახლში

მთვარე ამ სახლში ეგზალტირდება/ კულმინაციაშია. ფინანსური საკითხები. ფული ოჯახური საჭიროებებისთვის. ან პირველადი მოხმარების ნივთების ბიზნესი. რეკომენდებულია სიმღერა. ეხება ხმის იოგებს, ყელს.

 

III სახლში

გადაადგილება მოკლე მანძილებზე. ურთიერთობა ნათესავებსა და მეზობლებთან ყოფით საკითხებზე. კორესპოდენცია. სწავლა. რეკომენდებულია სუნთქვითი ვარჯიშები. ეხება ფილტვებს, ხელებს, მტევნებს, თითებს.

 

IV სახლში

მთვარე ამ სახლის სიმბოლური მმართველია. სახლთან, უძრავ ქონებასთან, საცხოვრებელ ფართთან, ოჯახთან  დაკავშირებული საქმეები.  ცვლილებების სურვილი ამ სფეროებში. ინტერესი ისეთი საკითხების მიმართ, რომელიც ეხება დედას (მის კეთილდღეობას მათ შორის). ეხება კუჭს. აუცილებელია ზომიერების დაცვა საკვებთან და სასმელთან დაკავშირებით.

 

V სახლში

ლტოლვა გართობის, მხიარულების, სასიყვარულო რომანების, თამაშის მიმართ. იზრდება აზარტი და სპეკულაციების სურვილი. რეკომენდებულია ურთიერთობა ასაკით უმცროს ადამიანებთან, ბავშვებთან. ეხება გულს, სისხლძარღვებს.

 

VI სახლში

სამსახურთან, თანამშრომლებთან, კვებასთან, სამოსთან დაკავშირებული საქმეები. ჯანმრთელობასთან დაკავშირებული თემები. ამ დროს განსაკუთრებული ყურადღება უნდა მიაქციოთ ცხოვრების ჯანსაღ წესს,თავი აარიდოთ გადაღლას და არასწორ კვებას. ეხება ნაწლავებს.

 

VII სახლში

ამ დღეებში დაწყებული პარტნიორობასთან, ქორწინებასთან  დაკავშირებული საქმეები ცვალებადი იქნება, თუ სახლი ფიქსირებულ ნიშანში (კურო, ლომი, მორიელი, მერწყული) არ მდებარეობს. ეხება თირკმელებს.

 

VIII სახლში

მთვარე ამ სახლში სიმბოლურ ვარდნაშია. „კორპორატიული ფული“. ცხადი სიზმრები. ურთიერთობა მიღმიერ სამყაროსთან. გარდაცვლილების მოგონება და შესაძლო კონტაქტიც კი მათთან. ეხება გენიტალიებს, სქესობრივ სფეროს.

 

IX სახლში

ყურადღება გადადის უმაღლეს სფეროებზე, განათლების საკითხებზე, შორეულ მოგზაურობებზე, რისი განხორციელებაც სავსებით შესაძლებელია. ეხება ღვიძლს, ბარძაყებს.

 

X სახლში

მთვარე ამ სახლში(ზენიტში) სიმბოლურ ტყვეობაშია. აძლიერებს საქმიან აქტიურობას. ცვლილებები საქმის წარმოებაში ან თავად საქმეში. თუ ამ ცვლილებებს აჩვენებს სხვა, უფრო ნელი პლანეტა, სავარაუდოდ, მთვარის ამ სახლში ტრანზიტის დროს მოხდება კიდეც. მთვარე, ასე ვთქვათ, ჩართავს კონკრეტულ მოვლენას. ეხება მუხლებს, ელენთას.

 

XI სახლში

გაფართოება და ცვლილებები სოციალური კონტაქტების სფეროში. სოციალური გააქტიურების მოთხოვნა. ახალი მეგობრები ან ურთიერთობის შეცვლა ძველ მეგობრებთან. ახალი იმედები და სურვილები. ეხება წვივებს, კოჭებს, სითხის გადანაწილებას სხეულში.

 

XII სახლში

ცვლილებები, შეფერხებები, წინააღმდეგობები და შეზღუდვები, რაც ძალიან საწყენია, მაგრამ ყურადღების გადართვისკენ გიბიძგებთ გარე მოვლენებიდან შიდა აქტიურობაზე: ჩაიხედეთ საკუთარ თავში. რეკომენდებულია მედიტაცია. შესაძლოა შეხება მოგიწიოთ საავადმყოფოსთან, თავისუფლების შეზღუდვის ადგილებთან. აუცილებელია არ არის თქვენ მოხვდეთ იქ, შეიძლება ვინმე მოინახულოთ. ეხება ტერფებს, ფსიქიკას.

სტატიის ავტორი: რუსა